A alcaldesa de Ribeira, María Sampedro, e o concelleiro de Deportes, Álex Vidal, recibiron á regatista Alejandra Vicens polos numerosos éxitos acadados ao longo do presente ano.

Tan só no 2026 xa sumou nove títulos ao seu palmarés deportivo: ouro no Campionato de España de Vaurien (As Pontes), bronce no Campionato Nacional Militar de Vela (Marín), clasificación para o Campionato do Mundo Militar e os Xogos Olímpicos Militares, segunda Palma Vela a bordo do TP52 AIFOS (Palma de Mallorca), ouro no Trofeo Conde de Godó a bordo do TP52 Hispania (Barcelona), bronce no Trofeo SM La Reina a bordo do TP 52 Hispania (Valencia), primeira no Campionato do Mundo de Vurien (Travemünde), prata na Copa do Rei a bordo do TP52 Hispania (Palme de Mallorca) e ouro na Copa de España de Vaurien (Barrios de Luna).

A ribeirense sempre estivo vencellada ao deporte, se ben, a nivel profesional decantouse por ingresar, con 18 anos, na Escola de Técnicas de Seguridade, Defensa e Apoio (Zaragoza) do Exército do Aire, de onde egresa como soldado especialista en Protección e Apoio á Forza. Tras varios destinos, actualmente atópase como Xefa da Oficina de Relacións Institucionais do Mando Conxunto do Ciberespacio do Estado Maior da Defensa. Ademais, é graduada en Enxeñaría Informática e técnica superior en Administración de Sistemas Informáticos en Rede e Sistemas de Telecomunicacións e Informáticos, así como varios cursos sobre seguridade no currículum académico.

Outros logros deportivos acadados no mundo da vela con anterioridade son o ouro na Copa de Galicia de Optimist (Vigo, 2009), ouro no Campionato Galego de Optimist (Vilagarcía de Arousa, 2013), selección galega de vela (Centro Galego de Vela, Vilagarcía de Arousa, 2011-2014), clasificación e participación en Copa e Campionatos de España de Optimist (2011-2014), primeira feminina no ranking galego de Optimist (1012, 2013 e 2014), prata na Copa de España de Snipe (Cádiz, 2022) e prata no Campionato do Mundo de Vaurien (Roma, 2025).