Desde 1997, tódolos anos se vén celebrando en Aguiño unha das festas gastronómicas máis apetecibles do Barbanza. Un día da última semana do mes estival de xullo ten lugar a Festa do Percebe, aínda que o ano 2003, o evento pospúxose ata o 14 de Setembro por mor do suspenso da veda destes moluscos logo dos prexuízos ecolóxicos causados polo fuel verquido desde o petroleiro Prestige.

A iniciativa da Festa do Percebe partiu do sector pesqueiro da zona co ánimo de dar a coñece-lo producto. O percebe de Cedeira e de Roncudo tiña gran sona, e o producido aquí merecía o mesmo prestixio. Así, a Confraría de Pescadores de Aguiño organiza desde hai 7 anos esta exaltación do preciado molusco. Na explanada do porto móntase unha carpa de 1500 metros cadrados baixo a que se abrigan longas mesas nas que degusta-las 4000 racións de percebe que soen servirse. Unha media de 5000 persoas saborea por un prezo que ronda os 10 €, a maior delicia que dan as rochas, acompañada de cachelos, pan, empanada de carne ou peixe, e viño ribeiro ou albariño (todo do país). Un grupo de gaitas ameniza o xantar, que comeza a despacharse ó mediodía e remata, por esgotamento de existencias, unhas 3 ou 4 horas máis tarde.