A brigada municipal de xardinería atópase estes días plantando diferentes especies de árbores en varias zonas axardinadas da cidade de Ribeira. Trátase dunha remesa de 23 árbores por un importe total de 4.967 euros entre os que se atopan plataneros, palmitos, photinias, tuliperos ou laurocerasus, como son coñecidos comunmente.

Esta medida céntrase, nun primeiro paso, en distintos emprazamentos da cidade e lugares de afluencia como o paseo das Carolinas, a praza do Concello, a rúa de Galicia, a avenida da Coruña ou Coroso. Posteriormente, irase ampliando o rango de acción a outros puntos do municipio.

En palabras do concelleiro de Parques e Xardíns, Vicente Mariño, "seguimos reverdecendo espazos públicos con esta remesa de árbores. Agora mesmo centrámonos no centro urbano e lugares de maior afluencia, se ben en vindeiras datas iremos chegando tamén ás parroquias." Neste senso, lembra que xa no outono se plantaron máis de 1.800 unidades de ciclamen en macetas e zonas axardinadas, tanto do núcleo urbano como das parroquias.