O concelleiro de Festexos debullou polo miúdo a programación da que comezou presentando a estrea dun novo produto turístico ou actividade que leva por nome Camiño de Valverde, (LARP) que se celebrará o día 12 ás 11:00 horas, no Parque Natural das Dunas de Corrubedo, de 11 a 14 horas. O LARP, ou –xogo de rol en vivo–, é unha modalidade de xogo onde os participantes interpretan aos seus personaxes de forma física e escenificada, interactuando nunha contorna real ou simulada para crear unha narración colaborativa, Suárez-Puerta especificou que empregando a lenda da cidade oculta de Valverde, “cuns 30 participantes, farase unha recreación medieval na que os participantes poderán interactuar nun xogo que terá moita aventura e fará que a xuventude de Ribeira poda ter unha mañá diferente”.

O concelleiro anunciou que aínda quedan prazas libres para gozar da actividade con reserva previa na oficina de turismo.

O mesmo venres día 12 ás 23:00 horas teremos a actuación de  Corazón Oxidado: Tributo a Fito y Fitipaldis na praza do Concello.

Xa na xornada do sábado día 13 teremos a V Ruada do Traxe Aires de Dorna que sairá da carpa municipal para facer o percorrido polas rúas de Ribeira e rematar no auditorio municipal co Desfile do Traxe. 

O Concelleiro significou que esta actividade xa se está consolidando dentro dos actos de celebración de Santa Uxía e animou á veciñanza a participar na propia ruada, “xa que aínda que non se teña o traxe, os interesados poden poñerse en contacto coa asociación Amas de Casa para que llo proporcionen”.

Na mesma xornada do sábado terá lugar o concerto de Kiko Veneno ás 11:00 horas na praza do Concello, “artista recoñecidísimo, autor de cancións como “Volando voy” que fixo famosa Camarón de la Isla así como a colaboración en diferentes proxectos musicais con millóns de reproducións nas plataformas de streaming” apuntou Colomer.

Suárez-Puerta rematou apelando á potenciación do día da patroa, “é unha festividade que temos que manter, enxalzar e levala cada vez a máis”.

Pola súa banda, Alfonso Mera afirmou “precisamos darlle á festa ese valor integrador e simbólico que é o que significa”. Tamén explicou que esta cita esta marcada en vermello no calendario para a Unidade Pastoral, “non só é a patroa da nosa parroquia senón que tamén é o corazón espiritual que vertebra a tódalas outras parroquias por iso a súa festividade determina un momento de encontro, de estar xuntos, de compartir a fe e tamén da connotación tradicional que evoca”.

A Misa Solemne na honra de Santa Uxía terá lugar o propio venres 12 ás 12:00 horas na igrexa parroquial de Ribeira.