Ribeira deu a benvida ao Nadal co acendido da iluminación na zona comercial e a inauguración do belén municipal. O acto desenvolveuse na tarde do venres 28 na praza do Concello; centro neurálxico con motivo do Black Friday. A rapazada foi a encargada de premer o botón que marca o inicio da época festiva por excelencia do inverno.

Durante o acto, a alcaldesa, María Sampedro, explicou que "decidimos que coincidise o inicio do Nadal en Ribeira co Black Friday para establecer sinerxías entre estes dous eventos cara a dinamizar social e economicamente a nosa cidade. En vindeiras datas, a iluminación tamén chegará ao resto da cidade e ás nosas parroquias para que todo o noso municipio, sen excepción, luza esplendoroso nunhas datas tan significativas."

O público congregado puido gozar de chocolate con churros para quecer o corpo e tamén se dinamizaron as contornas dos establecementos locais e hostaleiros co espectáculo itinerante A luz do Camiño, de Troula Animación, para xa dar paso á charanga BB+.

A maiores, xa está operativa a pista de xeo instalada no Malecón, promovida pola Asociación de Empresarios de Ribeira coa colaboración do Concello.