Ribeira, 18 de xuño do 2025.- O pasado mes de xaneiro se presentaba Di-Versos, cancións feitas nos colexios para facer oír a diversidade en Ribeira; un pioneiro obradoiro de composicións de cancións promovido polo departamento de Servizos Sociais do concello e levada a cabo polo compositor local, Fernando Pérez.
Neste programa propúxose a participación dunha aula de terceiro ciclo de cada centro educativo de ensino primario do concello de Ribeira, na que os alumnos e alumnas compoñerán, interpretarán e gravarán unha canción -co asesoramento e acompañamento dun profesional de contrastable capacidade e experiencia-, relativa a calquera tipo de diversidade, sexa cultural ou natural, promovendo valores como: xustiza, liberdade, igualdade, equidade, comprensión, respecto e/ou apoio mutuo. Cada unha das composicións foron inseridas nuns vídeos subtitulados que se atopan na web do concello: https://www.ribeira.gal/di-versos-canci%C3%B3ns-pola-diversidade
As actividades realizáronse principalmente no primeiro trimestre do ano 2025 e foron orientadas especialmente a alumnos/as do 3º ciclo de primaria, sendo decisión do centro a elección do grupo/aula a participar.
Participaron na nova iniciativa; o Ceip Pluriligüe Frións, Ceip Heroínas de Sálvora de Aguiño, Ceip de Olveira, Ceip Pluriligüe O Grupo de Ribeira, CEP Plurilingüe de Carreira, CEIP Pluriligüe de Artes, Colexio Galaxia de Ribeira, Colexio A Milagrosa de Oleiros, Colexio Sagrado Corazón de Castiñeiras e Colexio Bayón de Ribeira. Participaron máis de 250 rapaces e rapazas do 3º ciclo de primaria.
No día de hoxe celebrouse esta gala co obxectivo de xuntar a tódolos participantes e entregarlle uns trofeos e diplomas pola súa participación e dedicación desta nova iniciativa centrada en promoción os valores establecidos na Declaración Universal de Dereitos Humanos.
A gala foi conducida por Santi Páramo –impulsor da iniciativa— xunto con Francisca Vidal, coordinadora dos Servizos Sociais e acudiron o rexedor ribeirense, Luís Pérez, o segundo tenente de alcalde, Vicente Mariño, a concelleira de Educación, Cruz Rivadulla, alumnos e alumnas dos centros e profesorado.
A gala resultou moi amena e os participantes puideron visionar os vídeos onde se reproduciron as cancións creadas por eles mesmos, ao rematar os bloques de vídeos procedeuse á entrega de premios na que CPR Galaxia resultou premiado ao Talento Diverso; o CEIP Plurilingüe O Grupo, premio Ritmo de Cores; o CPR Plurilingüe La Milagrosa (Oleiros), premio Notas de Igualdade; CEIP Plurilingüe de Frións, premio Escena de Todos; o CPR Sagrado Corazón de Jesús (Castiñeiras), premio Harmonía en Movemento; CPR Bayón, premio Sorrisos con Identidade; CEIP Heroínas de Salvora (Aguiño), premio Voces que Unen; CEP Plurilingüe Carreira, premio Pasos con Corazón e CEIP Plurilingüe de Artes co premio Luces de Inclusión.
Alcalde, tenente de alcalde e concelleira repartiron os trofeos e diplomas desta gala na que se mostraron agradecidos aparte de sorprendidos pola gran calidade de tódalas propostas aportadas polos colexios apoiadas polo equipo técnico e o músico Fernando Pérez.
Na gala tamén se destacou o XX aniversario da Escola Infantil Municipal de Ribeira adscrita ao departamento de Servicios Sociais do concello que tamén participou en Di-versos cunha canción e recibiu un recoñecemento pola súa traxectoria que recolleu directora pedagóxica da escola, Olalla Ouviña.
